正反論壇打擂台 東網電視夠精彩

東網電視全新打造嘅四個時事評論節目分別係，由立法會議員黃毓民主持嘅《毓民踢爆》、時事辯論節目《正反論壇》、每日剖析時事嘅《港是港非》，同埋拆解每周新聞大事嘅《港事串燒》。為隆重其事，四個節目今日同時登場，《毓民踢爆》揭開政改背後嘅黑幕，引人入勝。而首集播放嘅《正反論壇》，則邀得社區組織協會幹事蔡耀昌與反對濫用綜援大聯盟召集人李梓敬打擂台，從正、反兩方面爭辯終審法院關於新移民居港一年即可申領綜援嘅裁決，兩人針鋒相對，火花四濺，令人大開眼界，大呼過癮。

話時話，自從終院對綜援案一錘定音之後，各方爭議不斷，言人人殊。元旦日遊行，協助新移民打綜援官司嘅蔡耀昌曾遭網民狙擊，搞到狼狽不堪。佢喺《正反論壇》中為自己辯護，強調判決法律依據清晰，居港一年可以申領綜援嘅規定喺○四年前一直行之有效，今次判決只係回復以前嘅做法。佢仲話唔擔心判決會延伸至公屋申請資格等，引發骨牌效應喎。

不過咁，反對終院裁決嘅李梓敬一啲都唔示弱，佢喺《正反論壇》中頻頻反擊，指社協「自打嘴巴」，最近已有團體協助新移民申請法律援助，準備就公屋政策提出司法覆核。佢又重申，反對判決係「應唔應該負擔嘅原則性問題」，擔心缺口一打開，今日綜援，聽日公屋，後日係長者生活津貼，沒完沒了，社會將難以應付巨額開支。

正所謂，公說公有理，婆說婆有理，雙方互不相讓，爭到面紅耳熱，甚至多次因為對方插話而出現「疊聲」場面添。好彩兩人都係君子，雖然彼此意見不同，但止於唇槍舌劍，喺節目尾段兩人均同意應該研究改善新移民來港後，內地戶籍即被註銷嘅政策添。嗱，呢啲咪叫理性辯論囉，《正反論壇》可以講係展示民主嘅最佳平台，唔怪得一推出就有咁多人捧場喇。

講到捧場，太一叮真係要講句多謝，全靠大家鼎力支持，「on.cc東網」至可以精益求精，東網電視節目至可以愈來愈精彩。各位網絡潮人，今日上咗東網睇咗東電視未吖？