話咁快就到年尾，身為打工仔，最關心嘅梗係有幾多花紅喇！但《爛果》印一份蝕一份，今年份花紅睇怕都凍過水，少膽虫一諗到呢度真係乜心情都無晒。

「少膽虫同我入嚟！」喺壹全霉打工真係連沮喪嘅時間都冇，「腦細有乜吩咐呀？」淫賤黎睇落好興奮︰「我諗到條絕世好橋！」佢一路講面上啲肥肉一路震，「你知唔知元朗啲幼稚園好多人排隊攞報名表？」九唔搭七，少膽虫惟有求其答句︰「腦細你想返幼稚園進修呀？」

「我上年小學畢咗業啦！」淫賤黎一面自信︰「咁大個商機都睇唔到，你點做腦腫呀？」少膽虫靈光一閃︰「啊！腦細你想炒賣幼稚園報名表！」少膽虫未講完，「啪、啪」聲已經響起，「真係摑少你兩巴都唔得！我係想叫你運啲《爛果》去幼稚園門口賣呀！」少膽虫諗唔明又唔想捱摑，惟有懶cute咁問︰「吓，點解嘅？」「攞報名表要通宵排隊，唔係個個家長有帶櫈嘛！我哋喺幼稚園門口賣《爛果》，用嚟霸位又得墊地坐又得，咁多功能實大把人買，到時你份花紅就有着落啦！」

第一手消息請下載on.cc東網iPhone/iPad/Android Apps