城中鏡：星級髮型師幫長者變「潮」
星級髮型大師Kim Robinson尋日帶領旗下嘅髮型師團隊，教在囚人士為長者理髮。雖然阿Kim今次嘅角色係指導性質，但大師出場，點都要露兩手，即場為一位長者形象大改造，為佢將長髮剪短。
Kim Robinson為長髮過肩嘅陳女士塑造新形象。
據懲教署署長單日堅講，歌連臣角懲教所每個月都會派幾位正在學習理髮技巧嘅在囚人士，到耆康會轄下嘅柴灣長者地區中心為長者義務理髮，咁啱阿Kim又有意做吓義工，打算免費為長者理髮，於是大家一拍即合。阿Kim今次為一位年逾六旬嘅陳女士理髮，阿Kim見對方長髮過肩，大膽決定塑造一頭短髮，當陳女士仍然心大心細，阿Kim一邊用廣東話大讚「你好靚」，然後三扒兩撥就為陳女士剪出一個清爽怡人嘅新髮型。
陳女士目睹自己嘅新形象，大讚阿Kim技巧了得，話令佢外表年輕咗三十年喎！在場賓客都盛讚阿Kim只憑噴壺同鉸剪等簡單工具，就為客人塑造新儀容，星級髮型師嘅稱號當之無愧。
