城中鏡：司馬燕施「髮」術 醒神開P
抗癌勇士司馬燕舊年身體經歷重大變化，最後憑住堅強樂觀嘅態度同埋家人嘅大愛支持，終於康復起來。回顧過去一年，佢笑言唔知係得定失？又話：「有病梗係辛苦，但如果冇病，點會有得『結婚』（司馬燕舊年喺歐洲補辦婚禮），呢個病令我睇到家人同朋友嘅愛，多咗時間去睇身邊嘅人同事，雖然痛嘅時候冇人會幫到你，但我痛完瞓醒覺就唔記得，好似飲醉酒咁！哈哈！」佢透露農曆年會同老公二人世界遊荷蘭，順便幫個仔搵學校。
戴住金色假長髮嘅司馬燕，早前同老公歡度佳節。
Jacky Ma（左）為司馬燕剪咗個黑白剷青短髮。
喺剛過去嘅新年，司馬燕邀請咗一班朋友喺屋企開派對，喺派對中更大玩變髮，繼早前嘅金色假長髮後，佢搵咗著名髮型師Jacky Ma為佢剪咗一個黑白剷青短髮，佢大感滿意咁話：「睇起嚟更加精神爽利，我已經過咗勁蒲嘅階段，依家反而享受跟屋企人同幾個朋友靜靜哋歎吓酒，食吓嘢，傾吓偈，我以前試過開一個party成一百人，其實咁多人邊傾到偈呢！」佢又話因為要同朋友聚會，所以將化療藥延遲食，因為食咗藥後會感到好疲累，而醫生亦允許。
