城中鏡：團年飯講意頭名人撐食雞
喺禽流感嘅陰霾籠罩下，唔少食家聞雞色變。不過，城中名人就話冇有怕，話只要將雞煮熟啲，今個新春團年飯，大肥雞少不了，咁至好意頭。
做雞隻飼料生意嘅陳幼南夫婦慨嘆禽流感影響飼料銷情，期望市民盡快恢復食雞信心。
梁智鴻（中）同名醫鄭淇德（右）贏馬，笑言要請梁高美懿的老公梁承達醫生（左）勁擦一餐。
陳振彬（右）話團年飯一樣雞照吃，左為愛沙尼亞駐港名譽領事林建康。
九龍樂善堂主席韓世灝話唔怕收到假金牛善款，皆因善長多數畀支票。
過年食雞，係中國人習俗，撞正禽流感再肆虐，新春食唔食雞好，都係大考驗。尋日喺沙田馬場遇到「飼料大王」Ian陳幼南，佢帶頭「撐」食雞，佢慨嘆受疫情影響，食雞人數減少一至兩成，影響所及，雞隻飼料銷情亦應聲下跌，令佢好頭痛。點樣食雞先最安全？佢有滿肚心得：「煮熟啲就得嘞！」所以新春期間，一樣雞照食，新年同家人聚餐，都會第一個夾雞食。
陳振彬讚潮式雞正斗
近排感冒到幾乎失聲嘅港大校務委員會主席梁智鴻醫生，都對食雞情有獨鍾，佢話：「我唔怕喎，大家煮雞時，整熟就唔怕嘞。」青年事務委員會主席陳振彬都「撐」食雞有理：「我哋潮州人過年，點可以無雞食o架!」佢大讚潮式雞好正斗，喺煮雞時加入少許鹽，鹹鹹哋，好好味。
之不過，唔係人人對食雞百分百放心，九龍樂善堂主席韓世灝就擔心疫情一日未消退，都係暫時少食為妙，旗下機構有提供膳食畀老人家，亦會因應營養師意見，暫時煮少啲雞。
近排坊間假金牛猖獗，收善款時會否中招？韓主席話幸好善長多數寫支票，唔怕收到假鈔。
