政壇：搞搞政：論政遭圍攻 蔣麗芸夠阿Q
好多立法會議員都博出位，希望增加曝光率。繼議員鍾樹根嘅「肯肯定」同「浪浪費」金句後，另一女將Ann蔣麗芸尋日亦喺城市論壇發表出位言論，話香港雖然未有一人一票，但民主程度相比亞洲其他地方優勝，隨即畀台下觀眾插爆。
設計圖片及對白
雖然阿Ann慘被眾人圍攻，難得佢仍然自我感覺良好，話大家猛問佢問題都係想佢有多啲曝光率，真係唔讚佢超級阿Q都唔得。
工黨李卓人喺論壇上批評政改諮詢唔肯討論公民提名，證明政府無誠意諮詢市民意見。阿Ann聽完反寸阿人想法負面，話最終方案一日未出爐，都唔可以鬧政府係假諮詢。佢之後仲愈講愈興奮，慨嘆即使西方國家選舉都有篩選，聲言喺香港實行普選會製造唔少事端。
同場有講者直斥阿Ann言論離譜，問佢既然話香港民主程度高，咁到底係好過緬甸定菲律賓先？阿Ann於是就引述美國非政府組織自由之家嘅數據，話香港民主程度喺亞洲區排名第一，又話美國前中情局僱員斯諾登之所以揀香港作落腳之地，都係因為香港係全世界最自由嘅地方。
