政壇：小童願望反擴建堆填區
政府早前透露會喺今年第一季，再把將軍澳、屯門同打鼓嶺三個擴建堆填區計劃撥款申請向立法會財委會「闖關」，原來早喺上月十八日舉行嘅工務小組會議，已獲批同堆填區有關連嘅顧問研究或道路研究等，合共款額為七千五百五十萬元，當局最快會喺本周五就三個堆填區計劃尋求財委會撥款支持添！環境局局長黃錦星想瞞天過海？冇咁易。
參與請願嘅小童把寫上反對擴建堆填區嘅訴求，貼喺願望樹上同黃錦星臉上。
終極關閉將軍澳堆填區約三十名市民，其中近一半係小童，尋日喺將軍澳日出康城外請願，抗議當局鬼祟將八百八十萬元將軍澳堆填區設計同建造顧問研究費用，綑綁其他工程，以基本工程儲備基金向財委會申請撥款，期間多名示威者手持「救救下一代，拒絕毒氣侵居民」標語表達不滿，多名小童更將反對擴建堆填區嘅願望，寫在大聯盟自製嘅願望樹上，要求議員當日否決有關撥款申請。
有份出席請願行動的立法會議員馮檢基，批評當局有關做法「不清不楚」，已去信立法會要求把將軍澳、屯門同打鼓嶺堆填區的綑綁工程項目，分開審批撥款，更指「如果財委會可以獨立審批工程撥款，當局被再否決申請的機會很高。」環境局回應時強調，申請整體撥款旨在為個別項目做前期工作，符合程序。
