政壇：落區宣傳政改高官似拉票
唔經唔覺，政改諮詢期開始咗一個月，一眾高官尋日開始落區諮詢派傳單。頭炮由政制及內地事務局局長譚志源帶隊，副局長劉江華同政治助理陳岳鵬幫手，無論大人小朋友都唔放過。
女長毛（左）向劉江華（右二）掟前稱路姆西嘅路福西公仔。
劉江華（左）派政改單張，勁似拉票。
譚志源（右）向青年解釋政改。
佢哋去香港仔宣傳政改，唔知係咪因為嗰度屬建制派地盤，尋日完全唔見有警察護航。點知派單張期間殺出「女長毛」雷玉蓮示威，周圍嘅「市民」隨即制服女長毛，原來佢哋唔係普通市民，大量便衣探員晨早滿布四周。
落區嘅整體過程總算順利，絕大部分市民都樂意接收政改宣傳單張，仲猛叫譚志源加油，但可惜唔係個個知道呢班高官落嚟香港仔做乜？例如宣傳單張上印有政改三人組嗰樣，有婆婆接過單張後，猛問工作人員係咪呢三個人選特首，仲話中間個女人幾好樣咁，搞到啲工作人員即刻澄清，話今次係政改諮詢，唔係選特首呀，但啲婆婆似乎唔太明白「政改」到底係邊科，一臉疑惑走人。
市民以為劉江華選特首
另一位伯伯亦非常留心，無論譚志源講乜都點頭答好，有記者問譚志源做特首好唔好呀？伯伯都話好。就連選舉經驗豐富嘅劉江華都被人誤會，佢一拎住個大聲公就選舉狀態上身，不停話「大家好，我係劉江華，我哋需要你哋嘅支持」，十足十選舉告急時拉票，搞到唔少市民都以為係劉江華選特首。
既然班公公婆婆唔太清楚，譚志源惟有轉攻小朋友，咁啱有兩位乖巧小朋友經過，佢就由頭解釋一次政改畀兩位知，雖然兩位小朋友聽完都係一頭霧水，但佢哋都好有耐性解釋。其實呢類型地區諮詢，實際作用未必好大，但起碼能夠顯示政府誠意同決心，所以政府不妨搞多幾次落區，話唔定民意分分鐘上升。
