政壇：講幼園學額施俊輝廢噏
跨境學童近年不斷增加，搞到北區學額供應緊張，唔少家長要通宵排隊幫仔女周圍撲學額。白鴿黨尋日喺上水舉辦地區論壇，討論北區學額規劃，除咗有該黨新東立法會議員兼黨主席劉慧卿撐場外，仲邀請到教育界葉建源同教育局政治助理Jeff施俊輝出席。
設計圖片
吳得掂「差到無人有」
正當眾人鬧爆教育局唔肯及早掌握跨境學童數據，令坊間難以評估雙非及單非學童入學情況時，Jeff就施施然咁話理解北區家長撲唔到學額嘅心情，因為就連局方都唔知每年到底會有幾多跨境學童嚟香港讀書，真係講咗等於無講。
葉建源話近年幼稚園入讀率不斷增長，喺○五至一二年間，全港入學率只係由百分之七十增加至百分之八十五，但北區就由七成升至九成五，認為情況已經響起警號。佢要求教育局盡早掌握跨境學童數據，及早規劃，同埋採取措施確保本地學童就近入學。
卿姐都話教育局局長吳克儉處理跨境學童問題真係「差到無人有」，又話自己喺立法會跟進呢個問題時，多次用「吳得掂」嚟稱呼吳克儉，但其他議員都無乜反應，證明大家都覺得佢唔係好得。
Jeff就承認當局難以估算跨境學童返香港讀書嘅時間和數字，令規劃存在限制，又話教育局自去年起推出小學派位分流措施，令學生亦毋須跨區返學，似乎係想為當局辦事不力補鑊。佢之後又話北區學額供應不足係由於市場供求失衡，又話掉番轉頭嚟講，北區唔夠幼稚園證明北區商機處處，呼籲辦學團體去北區開辦幼稚園，唔單止係打橫嚟講，簡直係廢話。
