城中鏡：蔡冠深開P 李嘉齡助興
「海產大王」、中華總商會永遠榮譽主席蔡冠深早前喺山頂道大宅宴客，預早同城中各界好友歡度聖誕佳節，政商名人同多國駐港領事齊去湊熱鬧，包括日本駐港總領事野田仁伉儷、新加坡駐港總領事傅光燊伉儷、霍英東集團行政總裁霍震寰同中總副會長方文雄等人，蔡太關穎琴同幾名子女齊出動招呼賓客，仲有靚女鋼琴家Colleen李嘉齡特別演奏三場，賓主皆盡歡。
獲獎無數嘅李嘉齡演奏娛賓，個個聽到入晒神。（受訪者提供）
蔡關穎琴（右二）招呼貴賓，包括傅光燊太太（左一）、野田仁太太（左二）同莫何敏儀（右一）。
大公子蔡雋思（左）穩重沉實，蔡冠深笑不攏嘴。
仔女多 接班唔使煩
罕有公開露面嘅蔡家大公子Johnson雋思亦有現身，記得Johnson被父母派到遼寧分公司學嘢，唔通佢返港過冬？佢話唔係，其實佢已經唔使長駐東北，依家改派越南工作。東北咁凍，越南咁熱，咁咪好難適應？佢笑笑口話東北有暖氣，越南有冷氣，使乜怕？佢對答如流，斯文穩重，難怪個個賓客都讚佢。
蔡冠深就話囝囝過去一年幾已分別派駐過遼寧、北京、天津同南京，而越南係蔡家嘅重要基地，梗要去熟悉吓，等佢慢慢掌握集團業務，以備將來接班。佢話集團生意多籮籮，涉及海產出入口、金融、地產、高科技等，好彩佢有五個子女咁話。
瞓身支持音樂嘅蔡太年年都請唔同嘅音樂家到府邸演奏，佢今年請Colleen係因為大提琴家李垂誼嘅推介。曾旅居德國嘅Colleen話同李垂誼喺德國時已相識，最近有機會喺蔡太支持嘅「樂．誼國際音樂節」表演，因此同蔡太結緣。
