陳景濤估計人仔每年應該有百分之一點五至二嘅升值空間。
相信大家都知道人民幣有升值潛力，宏利資產管理（亞洲）執行總監及定息產品高級基金經理陳景濤就話，以前拎住獅子銀行嘅一百蚊港紙就好威，依家人仔先係機遇，銀包無番張毛主席都唔掂喎！
人仔今年都升咗至少百分之二，甚為可觀，之但係仲可以升到幾盡先？陳景濤話身邊啲朋友年年都問，但係人仔年年都升，差在升幅有幾大。佢估計每年應該都有百分之一點五至二嘅升值空間。
佢尋日就抿咗張一百蚊港紙同一百蚊人仔現鈔出嚟，即興講咗個故事。話說呢隻獅子，係萬獸之王，去羅湖城shopping都有discount，直至聰明嘅人類出現，獅子想拎折頭就無咁易啦！佢無非想講，人仔有好大升值潛力，中國高增長故事有幾咁吸引，港紙唔係唔好，只係依家袋人仔就仲好！所以佢都話銀包點都要有張毛主席！
第一手消息請下載on.cc東網
