黃業光話睇唔通明年香港地產前景，寧願將資金投資歐美物業，博豐厚回報。
由於憂慮政府隨時再出招，香港樓市吹淡風，反觀英美等地產市場，就由谷底大幅反彈，吸引唔少城中名人越洋置業，東華三院總理兼香港鐘表業總會顧問John黃業光都話計劃入貨，尤其睇好西班牙房地產。
買磚頭一向最保值，經營鐘錶生意嘅John，最關心環球經濟動向。佢喺歐美都有置業，佢話估唔到倫敦優質地段物業彈得最勁，去年至今勁升百分之二十五；美國地產都升咗百分之十幾，相比投資香港地產，增幅極之吸引。展望明年，佢話仍然睇好歐美地產，當中一直落後嘅西班牙如巴塞隆拿等城市，過去幾年經歷低潮，依家係吸納首選，預計會升兩三成，美國就睇好紐約及洛杉磯。但投資海外物業始終有風險，入市前最好做足功課。
講完投資，阿John不忘為明年訂下玩樂大計，三月將與友人出動超級跑車遊東京，一嘗新賽道滋味，佢會出動私伙林寶堅尼戰車，友人就駕駛法拉利及保時捷跑車，一行二十多人浩浩蕩蕩征戰東京，認真大陣仗。
第一手消息請下載on.cc東網
