政壇：馬雲墨寶淘寶拍賣
阿里巴巴集團主席馬雲鍾情耍太極就好多人知，但原來佢對傳統書畫都有研究，最近仲宣布創作出佢第一幅「馬體」作品，計劃喺今個星期四擺上淘寶拍賣，收到嘅錢會捐出嚟做慈善。對於馬雲呢幅唔知係書法定係國畫嘅大作，內地網民相當捧場，有人話有「太極乾坤，峰迴路轉」嘅意境，估最後成交價會有五位數，但都有網友買定保險，先問清楚買咗之後，係咪可以享受淘寶嘅「七天內無理由退款」？
馬雲計劃喺今個星期四將畫作擺上網拍賣。
講到「馬體」，原來喺馬雲六、七歲嘅時候，因為佢爸爸好鍾意傳統書畫，逼佢每日食完晚餐後就要開始練毛筆字。見到其他同學仔玩緊嘅時候，自己要練啲覺得將來冇用嘅嘢，小朋友心情當然唔多靚，而結果就令佢練成咗今日嘅「馬體」。根據馬雲講解，「馬體」嘅最大特色就係保持住四十年無進步，整體狀態仍然停留喺六、七歲嘅水準，仲要帶住濃郁嘅鬱悶、埋怨、嚮往自由同逃出牢籠嘅風格。
佢話「馬體」同佢個樣一樣好有特色，想整容整成靚仔容易，整成佢咁樣幾乎無可能。
