設計圖片及對白
雖然免費電視牌照風波暫告一段落，但仲有好多手尾跟。好似立法會早前辯論引用《立法會（特力及特權）條例》（特權法），要求政府交出審批免費電視牌照嘅文件，大批市民包圍立法會嘅情況，揭發咗立會停車場原來有條秘密通道通向政府總部，唔少建制派嘅議員為求甩身，就利用呢條秘道輕鬆走人。
泛民有份用
泛民議員范國威就去信立會行政管理委員會（行管會），要求用混凝土將秘密通道永久封閉。據了解，佢尋日喺行管會會議上力陳封路理據，話喺「技術層面」上，立會大樓依家已有四個出入口，遲啲仲會有天橋連接隔籬嘅中信大廈，根本唔需要停車場嘅秘道。而且條秘道要立會同政府總部兩邊同意先可以用到，喺行政管理上有唔清晰嘅地方。至於理念上，行政、立法要獨立自主，所以應該清楚區隔開立法會同政府總部。佢又話既然議員成日要求官員面對民意，咁議員即使喺群情洶湧時亦應面對大眾咁話。
據了解，原來唔止建制派議員喺辯論特權法動議當日使用秘道離開，有泛民議員都有用呢條秘道。班議員作為既得利益者，大家都唔想封閉條秘道，最終佢哋以需要緊急通道為由反對封閉條秘道。總之大家都當范國威講嘅嘢係廢話。
咁又難怪嘅，范國威早前外借立法會議員專用浴室畀集會人士沖涼，死撐之餘又唔肯道歉，今次仲要燒埋落建制派度，建制派梗係唔會畀面佢啦。但為咗確保立法會嘅透明度，以及避免有人濫用呢條唔再係秘密嘅通道，行管會決定會釐定機制，列明喺邊啲情況下先可以用呢條通道，以釋除大家疑慮咁話。
第一手消息請下載on.cc東網
