競爭力上海爬頭 食老本香港沉淪

其實，近年香港國際排名節節敗退，除咗畀老對手新加坡愈拋愈遠，家陣又被上海超越，都係意料中事咯。究竟今次又衰乜呢？

研究機構話喎，近年上海發展一枝獨秀，喺科技、文化和教育方面都有較強嘅競爭優勢，加上成為第一個國家級自由貿易區等綜合因素嘅推動，城市綜合競爭力首次超過香港成為全國第一。反觀香港，過去兩年GDP增長同財政增長都比上海慢，成為失落冠軍寶座嘅主要原因。

嗱，呢啲咪叫眾人皆醒我獨醉囉。內地發展一日千里，而香港就如逆水行舟，不進則退，想唔畀人爬頭都幾難喇。最不堪嘅係，香港成長競爭力全國只排十一位咋，你話醜唔醜吖？如果話綜合競爭力係現在式，咁成長競爭力就係未來式，香港未來一片暗淡，簡直可悲。

話時話，若果香港繼續不思進取，點只上海爬頭，遲早仲會被北京、深圳、廣州、天津等城市迎頭趕上，到時香港可能連二流城市都做唔成。

太一叮唔係杞人憂天，香港沉淪大家都有眼見，只係港產官僚扮鴕鳥詐唔知啫。呢，香港曾經係全球首屈一指嘅貨櫃港，近年已先後被新加坡同上海超越，今年深圳亦後來居上，香港首次跌出全球三甲位置，再咁落去，低處未算低吖！

講來講去，一切都係貪曾累事，佢任內不務正業，一味顧住遊山玩水，搞到樓價租金狂升，營商環境惡化，加上經濟結構愈來愈單調，競爭力有乜辦法唔跌吖。本來呢，內地城市發展愈來愈成熟，香港嘅廉政及法治總算仲有啲優勢，家陣被貪曾集團一手摧毀，連呢啲優勢都冇埋，唔沉淪至奇喇。

最好笑嘅係，前朝政府敲鑼打鼓話要搞六大產業，點知志大才疏，眼高手低，結果搞來搞去得個吉。現屆政府雖然雄心勃勃，提出將產業做多做闊，可惜一樣有心無力。今時今日，香港社會泛政治化，風風雨雨，紛紛擾擾，港府疲於應付，舉步維艱，邊可能推動經濟轉型啊，所謂做多做闊，咪又係得個噏字！

無可奈何花落去，上海超越香港係意料中事，最怕香港日嘈夜嘈，繼續沉淪，遲早揸兜都似，叮！