城中鏡：鍾偉平自謔唔似老闆

稻香集團主席鍾偉平外表黑黑實實，雖然佢已貴為中式酒樓龍頭一員，但佢自言，三十幾年前出身「廚房佬」，家吓都係「老闆款」欠奉，佢仲自嘲，最常畀人當保鏢甚至收數佬喎。

鍾偉平外表平實，雖然坐擁龐大酒樓集團，仍自嘲被人當保鏢或收數佬。

鍾偉平嘅連鎖酒樓開到成行成市，又引入好多新概念，佢話自己勝在肯放手畀下屬作新嘗試，好似稻香係行內第一間酒樓改用電腦落單，又創辦中式飲食管理學校「稻苗學院」，亦係香港少數酒樓自設中央廚房。

稻香創咗咁多個「第一」，但佢都好謙咁講笑，話自己呢個老闆係「電腦盲」，莫講話用電腦，手機都只係識打出打入。