城中鏡：施俊輝擺酒冇預葉劉
年尾喜事多，教育局政治助理施俊輝（Jeff）日前結束鑽石王老五生涯，同拍咗拖一段時間嘅女朋友結婚。不過，Jeff秉持一貫低調作風，只向身邊好友透露結婚一事，擺酒都只邀請舊相識同官場部分同事，連昔日恩師、新民黨立法會議員葉劉淑儀都冇請，唔通佢驚葉太仲嬲緊佢當年靜靜雞加入政府一事？
施俊輝臨急臨忙結婚擺酒，連昔日恩師葉劉淑儀都冇請。（受訪者提供）
Jeff日前喺立法會現身，一講到老婆大人就顯得甜絲絲，佢話今年適逢嫁娶旺季，唔少酒店宴會廳一早被人訂晒，所以原本打定輸數諗住明年先至結婚。不過，八月底有酒店職員突然通知佢，話十一月三十號晏晝臨時有新人甩底，問佢肯唔肯喺當日擺酒結婚，仲限佢喺一星期內回覆，否則就會改問輪候中嘅其他新人。Jeff同當時仲係女朋友嘅準太座商量幾日後，決定提早過二人世界，就係咁，佢九月頭請咗幾日假去影婚紗相同籌備婚禮。
佢嘅婚禮擺咗廿幾圍酒，請咗政制及內地事務局政治助理陳岳鵬做「兄弟」，佢嘅頂頭上司教育局局長吳克儉都有去飲。
