企業成功各有秘訣，中華總商會（中總）尋日舉行企業家論壇，邀請城中企業家分享成功之道。莎莎國際主席郭少明（Simon）都分享佢嘅創業之道，七十年代佢哋由四十呎豆丁舖發展至今日業務遍布多個地方，好多人都認為佢哋品牌「莎莎」呢個易叫易記嘅名一定功不可沒，究竟係邊位風水師幫佢改個名嘅呢？Simon喺論壇上自爆，當年採用「莎莎」只係繼承上手舖位個名，皆因當年連一千元轉名費都唔夠畀，所以佢話要多謝當年放舖嗰位老闆喎！

企業家論壇吸引不少商界人士到場取經。

郭少明夫婦合力打造化妝品王國，佢尋日自爆，呢個品牌名只係承繼上手舖位名稱，唔係專登改o架。

觀瀾湖集團主席朱鼎健都獲邀出席論壇，分享創業心得。

呢個論壇吸引唔少商界精英到場聽書，好似中華總商會會董張俊勇、仲良集團主席、蔣麗芸丈夫梁海明都有擔櫈仔捧場。Simon嘅分享令人叫絕，其他嘉賓亦各自分享創業心得及多年來點樣克服經營難關。恒生銀行前女大班梁高美懿（Margaret）就回憶吓喺銀行界打拚嘅往事。

梁高美懿拒絕朝九晚五

Margaret喺銀行界淡出後，先後出任「立法會議員及政治委任制度官員薪津獨立委員會」成員及港交所董事，早前更有傳佢可能加入政府添，到底佢有冇意思呢？Margaret話，政府一直都有同佢傾過唔同嘅發展機會，但要佢坐定定喺辦公室返朝九晚五就要諗清楚先得喇。

第一手消息請下載on.cc東網iPhone/iPad/Android/Windows Phone Apps