阿保一族：洗石天使
【記者陳淑珍】塗鴉三分鐘，洗石一年功！看見山頭天然岩石上滿是塗鴉，時而書寫「大字報」、時而吟詩作對，愛行山之人無不痛心疾首。Alan是其中之一，他更於兩年前擔當義務「洗石天使」，以雙手一抹一擦，用天然方法清潔塗鴉，讓香港獨有的岩石回復天賜美貌。
一班洗石天使為岩石回復天然美。
香港有不少珍貴的生態地貌。
有公司發動員工擔當義務洗石天使。（甘偉倫攝）
Vivian（右一）向一眾洗石天使介紹長洲地貌岩石。
洗石天使堅持不用任何化學物料洗刷，只用沙紙和鋼絲刷走塗鴉。
Alan（右）和阿Fay（左）希望塗鴉者不要因一時貪玩，而破壞石頭外觀。
「最常見一定係『到此一遊』，不過依家咩都有；啲人求其寫句嘢，三分鐘唔使，呢首詩我哋刷咗六、七次都仲喺度！」Alan搖搖頭，指向石頭上的字句，痛惜石頭表面上不能挽救的創傷。「要完全復原已經唔得，我哋堅持用最原始的方法洗刷，絕對唔用化學嘢，將損耗減到最低。」Alan戴上勞工手套，一手沙紙、一手鋼絲刷，埋首苦幹，對着用油漆塗上、簇新的詩句刷啊刷。
二十分鐘過去，字迹只是輕微淡化，「有時會覺得徒勞無功，刷一次唔得，惟有等下次嚟嗰時再刷。」任職銀行的Alan，熱愛遠足，一星期最少行山一次。
愛惜自然由教育開始
他表示，行山時經常發現石頭被人劃花，遂於兩年前擔任香港地貌岩石保育協會的義務「洗石天使」，保護天然岩石。他至今已累積不少洗石經驗：「記住刷石時唔好張開口，啲灰粉會飛出嚟，仲有唔好一味用蠻力咁刷！」
Alan亦曾帶小朋友往洗石，「佢哋會好落力咁刷，又會諗好多計仔，例如淋水去刷。」他認為，愛惜石頭和生態地貌應由教育開始，「最重要梗係教年輕人唔好塗鴉，其次希望佢哋提高環保意識，一齊義務清潔石頭！」
「天使」捍衞天賜石頭美態，同行的另一義工阿Fay亦是愛行山之人，對石頭和植物尤感興趣，今次是她首次參加洗石行動，「原來不消半個鐘，已經咁攰，今晚食飯會手震！」阿Fay指，不斷刷石頭時，表層礦物不停掉落，感到「好肉痛」，希望塗鴉者切勿一時貪玩，破壞天然寶藏。
