SUN搞作：少膽虫手記︰左右逢源
「丟這thing，丟那thing，壹事無成！」淫賤黎又喺房度咆哮，少膽虫心諗尋日丟路姆西嘅瑞典式問候應該令佢好開心o架，點解又發癲？少膽虫滿腹疑惑入房，淫賤黎卻唔理三七二十一，一巴巴冚埋嚟咁鬧：「又話丟完我就會好嘅？今日《爛果》燒量再創新高之餘，又畀『靜宜聯萌』狂插我哋作新聞亂改名！你點解釋？」
少膽虫當堂明晒，燒量嘅嘢控制唔到，但「靜宜聯萌」的確係由少膽虫得罪，幫佢嘅李萌主起咗個「左派新星」嘅朵，人哋覺得好眨義。「腦細，包喺少膽虫身上，一定可以氹掂佢！」少膽虫自信十足。
少膽虫約萌主出嚟hi-tea，對方好唔情願咁出嚟話：「畀兩分鐘你，講！」少膽虫深知做人做虫，都要兩面三刀，於是由大右派即刻轉軚：「傻豬嚟嘅，點解你會覺得左派係貶義啫？左派從來都係為全人類從階級、種族、性別等等壓迫中解放出嚟，建立平等自由嘅社會，你睇吓我哋中國嘅孫中山、魯迅、李大釗，有邊個唔係左派？」「原來係咁，怪錯你喇……」萌主聽見心花怒放，嬌羞道：「其實咩新星吖，擔當唔起，喺西環打份工啫！」於是又言歸於好。雖然蒙混過關，但左又好右又好，少膽虫何嘗唔係打份工啫嘅心態？
