政壇：諮詢政改工聯會拖字訣
政府展開政改諮詢後，擁有四十萬名會員嘅工聯會，尋日都話未來會開足四場諮詢會，諮詢一眾會員，仲話明年五月初先會向政府提交意見，諮詢期足足五個半月，諮詢仲耐過政府，使唔使啊？副會長黃國健話佢哋坐擁幾十萬會員，要慢慢諮詢至得，實情卻可能係睇定啲。如果大家心水清，都記得上次政改一役，白鴿黨最初提出「一人兩票」方案時，絕大部分建制派都批評方案違反《基本法》，點知北京竟然讓步，認定該黨一人兩票方案，勞煩一眾建制派要周圍搵落台階「打倒昨日的我」，最後要面懵懵咁支持該黨嘅方案。
經此一役，建制派梗係要謀定後動，近日雖然唔少建制派提出政改方案，都係用個人身份，唔敢以黨或組織名義提出，就係想博大霧估中終極方案後才扮先知。至於工聯會要拖到五月初先公布，黃國健同理事長吳秋北都無特別解釋，但工聯會可能喺明年五月一號拉大隊訪京，屆時好有機會接近權力核心收風，當收到較為準確風聲後，先向特區政府提交意見，咁一定「八九不離十」喇。
講到下屆特首選舉，黃國健講笑話工聯會肯定會推薦特首候選人，但未有打算自己派人落場參選，除非突然發現有好似吳秋北呢類人才喎。吳秋北一聽即刻勁緊張，猛澄清話黃國健只係講笑，叫大家唔使咁認真。
