政壇：億元賭局王健林叫勿認真
內地商界名人好興就既定話題賭一鋪！去年年尾，內地首富兼地產界大佬萬達集團董事長王健林，曾經同阿里巴巴董事局主席馬雲有個戰書，涉及一億元超豪賭局，對賭如果十年後電商喺內地零售市場份額佔比超過五成，王健林就輸一億人仔畀馬雲，反之馬雲輸。事隔一年，王健林轉軚，喺央視嘅財經論壇上面公開宣稱「億元豪賭就此作罷」，仲預告自己同馬雲好快會有合作。
王健林宣布，與馬雲的一億元豪賭作罷，雙方仲要攜手掘金添。（資料圖片）
「雙十一」時淘寶等交易額突破350億元人民幣，一度令馬雲同王健林嘅「億元賭局」再被熱炒，事關馬雲宣布完「雙十一」銷售佳績之後，即時再單挑中國首富，要大家記住「如果二○二○年王健林贏的話，就是我們這個社會輸了，是我們這代年輕人輸了」。劍拔弩張一輪，王健林卻話個賭局其實只不過係個玩笑，首富仲解釋，當年嘅賭局係應央視導演要求，喺台上搞吓氣氛，根本唔可以當真。
講到尾，佢跟住嘅宣布實在啲，事關萬達都有進軍電商行業，最快今個月就會開始推出網店同實體店嘅商業經營模式。
