政壇：路姆西斷市學生哥撲空
「一擲成名」嘅狼公仔路姆西（Lufsig）搶購潮繼續，仲剩餘少量存貨嘅宜家家居沙田分店，有客人晨早七點幾已經霸定位排隊，最少有成過百人輪候，結果近三百個籌喺開舖唔夠十分鐘就火速派晒，銅鑼灣分店大約百二個籌亦喺短時間內派完，宜家中午喺社交網站宣布今年所有Lufsig存貨已經售罄，一月初先至會再返貨。
路姆西嘅存貨火速售罄，市民要買就明年請早。（霍力誥攝）
有八名中學生特登去沙田分店買公仔，結果撲個空。
尋日下晝，有八個中學同學仔特登遠道由屯門去沙田買公仔，結果撲個空。路姆西咁渴市，本地拍賣網站有人標價二百八十元，比香港門市購買嘅折實價八十四元九角高成兩倍幾。至於內地淘寶網亦有人叫價人民幣一百八十八元，但會唔會炒燶就唔知嘞。路姆西熱潮亦引起內地同國際關注，有人更加將路姆西帶到北京天安門前留影，有網民仲話，上海嘅路姆西亦被搶購一空，認真誇張。理工大學助理教授黃國才就喺社交網站發起「全港第一屆路姆西飛行大賽」，呼籲市民趁特首今日到觀塘出席活動時，讓「路姆西」飛行喎。
