政壇：「肯X定有問題」樹根疑似爆粗
立法會議員鍾樹根捲入疑似爆粗疑雲！網上尋日瘋傳佢喺電視台節目爆粗講咗句「肯X定有問題」嘅片段，但係，你有你指控，樹根就強烈否認自己曾經爆粗，只係承認口快快講咗「肯肯定有問題」，並非如網上所指「肯X定有問題」，佢仲批評係別有用心嘅人士蓄意嫁禍同抹黑。粗口爛舌影響形象，從政者更要避開開口夾着脷惹起爭議，樹根今次嘅言禍，究竟係唔夠字正腔圓定係漏嘴，佢都要小心被標籤為「問候一族」，否則政途生涯勢更多難。
設計圖片及對白
尋日網上瘋傳樹根疑似爆粗「肯X定有問題」嘅片段，據聞呢個電視台時事節目片段係前日播出街，當主持人問到政府係咪有管治問題時，樹根即時自動波回應話「完全話無問題就唔係」，之後又爆咗句「肯X定係有問題」，呢句說話嘅音疑似爆粗，但當時未見主持人同坐佢旁邊、另一嘉賓「快必」譚得志有乜異常反應。
快必搶白 一時漏嘴
事隔一日，呢段訪問片段就成為焦點，網上瘋傳樹根疑似爆粗，有網友仲動員向當局投訴樹根爆粗添。樹根多次翻看節目片段後強烈否認爆粗，聲稱當日節目期間經常受到快必「搶白」騷擾，所以口快快講咗「肯肯定有問題」，強調一切只係「漏嘴」。樹根重申，有關節目編導事後未有提出節目內容有任何問題，只係網民「生安白造」指控，究竟孰真孰假就留待大家自行判斷嘞！
事實上，盤據地區多時嘅樹根一向出言生鬼、冇禁忌，早前批評政府未經村民同意，便將西灣村納入郊野公園等同「搶人老婆」，最近又寸爆香港電台分兩次申請開支好似「未過門，先洞房」，又有一次叫香港電視網絡主席王維基「收皮」，今次再增加疑似爆粗「肯X定有問題」嘅金句惹爭議，唔知樹根下次有乜新「佳作」呢？
