SUN搞作：打橫嚟講：大陸卑劣惡行在港落釘了！
老友阿K北上打拚十年，返港茶敍，詳述大陸實況。
阿K是個生意人，不講政治，只顧事業發展，不違心的實幹工作，談及經驗和心得，阿K懇切地吐出心裏話，叫我眾酒友謹記：喺大陸千祈唔好心軟，做好事！
嘩呀！在我們心目中，阿K是個一等良善分子，幹嗎飲過大陸水後，竟異變為一個鐵石心腸的「硬漢」？
阿K解釋，喺大陸十年，一個「真朋友」也沒有的，不是他不以真心待人，而係嗰度啲人，全不需要真誠好心，相反，善心者，沒有好下場！阿K舉了一個例，若見到有人癱倒街頭，就千祈咪埋去睇，又或，即使見到阿婆單獨過馬路，亦不可埋去攙扶，否則，會自討麻煩！
咁啱得咁蹺，呢日報紙，有大陸新聞報道，喺四川達州，有三個八、九歲小孩遇見一老婦跌倒，便上前扶佢，此刻，撲出一壯漢，話三個細路撞跌佢老母，捉佢哋回家，索償七千五百元人民幣「醫藥費」，鬧上法庭，該「受傷」老婦哭訴係小童推跌她的，還說若她講大話騙人，全家死絕！結果係點呢？有三個目擊者出庭證實係婆婆「自跌」，小孩過去幫忙而已！最終官判老婦兒子敲詐勒索，罰款五百。雖然，還了小孩公道，但童年陰影已出現。小孩們事後話，以後見有人出事，都不敢去幫手，若「不幸幫人」，先看有無證人才去行善。
上述呢啲卑劣惡行，無日無之，故不能怪有人「見死不救」，這就是大陸人的「身教」。一個不講道德的地方，如何孕育出有良知的國民呢？
不是開玩笑，更醜惡的大陸行為，已在香港落釘了！點搞？
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
