城中鏡：加讚過大禮 出動五輛車搬
「玩具大王」蔡志明獨子蔡加讚（Karson）同汪圓圓嘅世紀婚禮將於本周六舉行，蔡家娶新抱排場十足，除咗有豪宅及頂級鑽飾送贈畀一對新人之外，早前過大禮時，搬去女家嘅禮品多到要出動五輛七人車搬運，而且禮物種類繁多，應有盡有，山珍海味外，仲有西瓜咁大嘅蘋果，同埋乒乓波咁大粒嘅提子，夠晒誇張。難怪圓圓話睇到咁多禮物，都有啲驚訝，Karson就呻話：「當日我同一班兄弟搬到腰酸背痛」！
加讚與圓圓專程赴法國影婚紗照，浪漫爆燈。
蔡加讚本周六舉行婚禮，早前過大禮，禮物堆滿一地。
抱得美人歸，辛苦啲都值啦，等待好日子嘅Karson就期望，時間可以快一啲，等婚禮可以早啲到。回憶求婚當日，圓圓話當日係佢哋拍拖兩周年，Karson帶佢去睇愛情戲，入場至發現冇人，原來Karson包咗場。後來Karson藉詞屋企有啲嘢畀佢睇，於是載圓圓返屋企，一入屋就見到好多蠟燭及氣球，仲有一大束玫瑰，Karson跪低遞上鑽戒求婚，好浪漫咁話：「Will you marry me？」圓圓當場呆咗，仲要Karson講多次添！就係咁，呢對俊男靚女拉埋天窗喇。
