城中鏡：李承康留鬚撐抗癌行動
富豪趙世光女婿李承康（Dominique）為喚起男士關注抗癌，本月初起與四個好友齊齊留鬚。以「二撇雞」新形象示人嘅Dominique，早前出席婦女團體「養心匯」午宴，為身為萬達成衣出口公司主席嘅媽咪李顏玉秀打氣。老友爭住問Dominique點解留鬚，原來佢參加咗喺外國好流行嘅「MOVEMBER」行動，參加者需於十一月起留鬚一個月，喚起身邊朋友好奇，藉機提醒朋友抗癌。滿嘴都係鬍鬚，Dominique話食嘢無唔方便，反而自己好唔慣，恨不得快啲到十二月，第一時間剃鬚。
「二撇雞」李承康（左）與太太趙式和（右）齊撐媽咪李顏玉秀（中）分享女強人奮鬥心得。
媽咪分享奮鬥經歷
講番個午宴，Dominique媽咪以成功女企業家身份上台分享奮鬥經歷，原來佢二十來歲已喪夫，為生活暫且放下囝囝，獨自去紐約當時裝採購，經歷過備受歧視同創業失敗，幸好得前老闆介紹唔少外國大買家，成功闖出新天。今天佢公司全球員工逾千，李太話「人生有挫折先有激情」，勉勵年輕人要勇於實現夢想。
