城中鏡：遇涉谷洪七公 黃傑龍決心滅窮
港人熱衷遊東瀛，唔少人都鍾意喺當地掃貨，不過，關注貧困問題嘅十大傑青黃傑龍（Simon）日前赴東京公幹就發現另一面，畀東京涉谷街頭披頭散髮、十足丐幫幫主「洪七公」嘅露宿者嚇咗一跳。Simon話，繁榮如東京一樣有人慘到露宿街頭，佢計劃喺社交網站facebook搭建一個平台，鼓勵網友上載身邊嘅好人好事，希望集腋成裘，齊心解決全球貧窮問題。
黃傑龍遊東京參觀和牛食品工場，順便考察當地民情。（被訪者提供）
Simon喺繁華嘅涉谷巧遇露宿者低頭食麵，情景令人心酸。
參觀和牛工場搵靈感
曾到東京多次嘅Simon，以往只留意當地食肆有乜新食材同新菜式，自從早前參加電視台節目，親身體驗貧窮滋味後，忽然對個「窮」字敏感咗，早前去到東京見到有中年人露宿公園及商場內，百感交集。不過Simon又同時發現東京比香港優勝之處，就係租金平好多。以銀座、涉谷等呢啲人氣咁旺嘅市中心地段為例，一個六百呎單位，月租只需約五千港元。相比之下，香港租金真係「癲價」。
不過搵蝸居都係其次，搞掂三餐最實際。Simon早前發起「代用飯計劃」助貧苦大眾，一呼百應。唔少食肆老闆及大機構齊心響應，都話希望為香港出一分力喎。
Simon喺香港經營唔同路線嘅食肆，部分專賣牛肉，原來佢長期幫襯日本買牛肉，因為欣賞日本人做嘢夠嚴謹喎，佢今次去東京，就參觀咗和牛食品工場，睇佢着晒保護衣又戴咗帽入工場，相信佢搵到唔少新靈感，可以讓佢帶返嚟加以發揮。
