政壇：搞搞政：爭區會空缺 單仲偕或撼陳淑莊
政圈爭位傳聞不絕，最近盛傳南區區議員馮煒光出任新聞統籌專員，海怡西選區一旦出現空缺，白鴿黨同公文袋都(目及)到實，好大可能代表白鴿出選嘅係單仲偕，公文袋方面就想搵陳淑莊出戰，兩人會唔會對撼？唔想鷸蚌相爭漁人得利，兩黨都接觸過，喺第一回合協商個選區係讓畀單仲偕。白鴿期望憑呢個議席，為單爭得張區議會超級議席入場券。
設計圖片
二○一六年嘅政壇布局依家雖言之尚早，但白鴿黨嘅兩個超級議席、即何俊仁同涂謹申，前者好大機會退休，後者就算再選區議會，都必會遭到其他政黨派出重炮手追擊以斷其後路，單仲偕係該黨買嘅另一個保險。不過紙上談兵當然容易，現實又邊有咁理想？南區海怡西呢個空缺，覬覦嘅又點只泛民兩黨呢？已經擺明車馬要去選嘅，仲有新民黨嘅新人陳家珮。
呢度要講番少少背景，馮煒光一一年成功連任，只係以十二票之差贏咗新民黨嘅施俊輝，所以新民黨喺呢區唔係完全無基礎o架。何況，政壇日日有變化，單仲偕進軍區議會都好多變數o架。
