政壇：戴耀廷網片變牛下阿叔
佔領中環發起人之一戴耀廷係法律系副教授，見親佢都係西裝骨骨，點知日前見到條片，佢一身麻甩look，一邊食薯片、一邊攞掃把走去掃街。點解戴耀廷要大玩形象，仲要去到咁盡呢？
呢段片係佔中尋日上載互聯網嘅，戴耀廷首次粉墨登場同小學生一齊講吓普選嘅重要。佢話，片段較容易入屋，仲形容片中嘅佢「形象去到幾盡」。梗係啦，中環人變咗牛下阿叔，難怪戴耀廷自己都話唔係好慣，要適應吓。
不過，佢不但勇於嘗試，仲透露嚟緊仲有啲更加「爆」同更市井嘅宣傳片，依家仲傾緊考慮緊出唔出街，怕會影響形象，如果決定出街，最快一兩個星期之後推出，相信睇到會「嘩」一聲喎。本身係法律系副教授嘅戴耀廷咁擔心影響形象，大家又放長雙眼，睇吓佢可以去到幾盡囉。
