政壇：雷賢達剃髮支持「毅行者」
有「基金教父」之稱嘅雷賢達（David）退而不休，除關心本港房屋問題及強積金長遠發展之外，仲好熱心改善教育問題！好似早前「毅行者」活動開鑼，David經常探訪嘅大嶼山大澳佛教筏可紀念中學亦有三隊同學仔出征活動，而佢哋出征之前，全校近四百名師生仲喺學校操場搞咗個「齊剃髮，發善願」大會，一於以剃頭行動表示決心。當日David帶埋太太出席，甚至後尾自動自覺參加埋剃髮行動，以行動支持班學生哥。
雷賢達（前）喺一班同學仔陪伴之下，剃髮支持佢哋出征毅行者。
David依家不時去中學探訪，尤其關注貧富懸殊下，特殊家庭嘅青少年發展。佢話：「其實香港嘅貧富懸殊好嚴重，父母要出外工作，自然疏忽照顧小朋友，我發現好多青少年唔願讀書，誤入歧途，甚至去食毒品，其家庭背景唔係新移民，就係單親家庭，所以我得閒就會去中學做探訪，同啲中學生傾吓偈，鼓勵佢哋發憤圖強，千祈唔好放棄自己，因為只有讀好書，跨代貧窮先有希望獲得解決。」
