政壇：象哥呷徒弟周浩鼎乾醋
立法會進出口界議員黃定光（象哥）已經冧莊三屆，佢計劃下屆退下火線，盛傳接棒嘅就係青年民建聯主席周浩鼎，象哥每年都趁蟹季請朋友拆住蟹腳聯誼一番，尋日大家又聚，下周六正式同任職美國有線電視新聞網（CNN）嘅未婚妻拉埋天窗嘅周浩鼎都在座，象哥罕有咁向呢位徒弟開火，話至今都未帶未婚妻畀師傅過目，仲問：「我應該都有茶飲o架嘛？」
黃定光（左）收周浩鼎做徒弟，嗜蟹可能係首要條件。
象哥雖然呷晒乾醋，但對徒弟都算唔話得，早排除咗提拔佢進身中出常務會董，象哥透露不時都會帶周浩鼎見吓中華進出口商會班兄弟，但得唔得到世叔伯支持，喺下屆立法會選舉更上一層樓，就要睇佢造化喇。
嗜蟹嘅象哥話佢要向大閘蟹說不，點解咁忍口？佢解釋，體內膽固醇、血糖同血脂樣樣超標，已經戒口好耐，「三年來一隻蟹都冇掂過」，但象哥明明上年宴客先「偷食」，唔好扮失憶喎！
