政壇：程守宗未坐正黑莓大換血
智能手機市場競爭激烈，加拿大智能手機生產商黑莓（BlackBerry）喺市場大風浪下，最近都有唔少動作，臨時行政總裁程守宗上任短短三星期，管理層就出現大地震，其中營運總監Kristian Tear、行銷總監Frank Boulben更加要即日執包袱走人。究竟公司係要換血？定係有架構新部署呢？黑莓只係話唔會填補呢兩個職位，至於由邊個接手亦冇交代，似乎手術仍在進行中。
程守宗尚未正式掌舵黑莓，已展開連串大手術。（資料圖片）
程仲未「坐正」黑莓舵手，但已揚言會繼續「調整高層管理團隊」，即係話唔定仲有高層會收到大信封。難怪有分析形容，程做嘅嘢根本唔似臨時行政總裁，直情係大刀闊斧改革；標誌住黑莓要變身做一間面向企業客戶嘅科企。管理層大革新，相信都係要重整旗鼓，迎接新嘅挑戰。
除上述兩名大員外，財務總監Brian Bidulka都被撤換，但可以以程守宗嘅特別顧問身份，喺黑莓做到出年三月尾，以便交接工作得以順利完成。至於○七年開始出任董事嘅Roger Martin亦將卸任，董事局人數包括程守宗在內，從此只剩番七個。值得留意嘅係，佢哋全部都係兩年前開始任命。
