政壇：煙民議員頂癮大鬥法
全面禁煙推行以來，辦公室及封閉處所工作嘅人最受影響，有份通過呢個條例嘅立法會議員亦冇得走雞，煙民議員要煲煙真係要出盡渾身解數。到底立法會議員有幾多個煙民呢？眾所周知嘅除咗長毛梁國雄、黃定光同廖長江外，原來仲有第四個，佢就係建仔嘅女將蔣麗芸（Ann），早前立法會辯論免費電視牌照時，黃定光因外出「叉電」被罵，究竟「四大煙民」點樣過煙癮呢？
設計圖片及對白
有傳Ann身為「隱蔽煙民」，不惜安排司機車佢去立法會附近嘅分域碼頭「抖氣」，嘩，食煙已經唔健康，仲要特登揸車去食就更加唔環保，罪加一等喎。阿Ann承認早在大學時期已經食煙，但強調只係「淘氣」得閒同朋友飲吓嘢食兩支，名副其實嘅social smoker（社交煙民），有時一日都食唔到一支，話老公梁海明都知o架。
至於專登揸車駛去分域碼頭扯煙嘅傳聞，Ann反駁只係咁啱同朋友喺嗰度餐廳食飯，煙癮起食一兩支咋喎，仲反踢爆范國威同林健鋒都係煙民嚟添，愈爆愈多人被拖落水，似乎立會「隱蔽煙民」嘅陣容唔輸畀顯性煙民喎。
點都好，議員開親會都好長氣，身兼煙民嘅會唔會周身唔舒服呢，佢哋點樣解癮呢？尤其家吓長毛傷咗腳，出入都要坐輪椅；廖長江同象哥之前喺立法會對開「打邊爐」，被我哋踢爆後，就轉移陣地匿喺中信大廈對出嘅小型草叢扯煙。長毛就曾經鬧出議辦疑似吸煙火警，總之，食煙難係啦。
