消防官僚不務正業 打壓東方居心叵測

係咁嘅，最新一期審計報告揭露消防處最少十宗罪，其中最離譜嘅係公然造假，聲稱過去兩年處理消防安全投訴百分百達標喎，點知被審計署踢爆不符事實，部分個案嚴重延誤，所謂嘅百分百達標，原來係百分百大話。呢，審計報告揭露消防處積壓逾一千五百宗投訴未完成處理，最嚴重拖延四百二十五日。仲有吖，就算有樓宇警鐘一年誤鳴超過一百次，佢哋照樣闊佬懶理，等於喺全港埋下無數計時炸彈，簡直靠害。

事實勝於雄辯，消防處對堆積如山嘅危急投訴熟視無睹，但係收到一封子虛烏有嘅電郵投訴就急不及待直闖東方調查，你話唔係玩針對都冇人信喇。公道自在人心，立法會議員陳偉業早前要求當局解釋有冇濫用職權滋擾傳媒，保安局局長黎棟國回覆時一味顧左右而言他，答咗等於冇答。咁又難怪嘅，消防處擺明選擇性執法，製造白色恐怖，打壓正義傳媒，咁醜陋嘅用心點宣之於口呀？

唉，沒有最醜，只有更醜。消防處不務正業滋擾傳媒，已經夠醜陋o架啦，家陣仲被揭破疏懶失職，令火警危機處處，置市民安全於不顧，簡直醜上加醜。好心啦，消防官僚有時間處理虛假投訴，踩上報館搞搞震，不如做好份工，清理火警危機仲好啦，否則，萬一有乜冬瓜豆腐，你哋盞火燒後欄嘅咋。嗱，審計報告踢爆，消防處唔止處理投訴懶懶閒，對於大廈消防安全隱患更加關人個關，包括全港四成四即兩萬幾幢樓宇無交年檢報告、二十個危險儲存倉無按法例續牌，以及一半戰前舊樓冇進行安全巡查等等。香港火警危機四伏，遍布計時炸彈，消防處處長陳楚鑫何止十宗罪吖！

講開陳楚鑫，呢個世紀惹火尤物今次真係火燒後欄嘞。堂堂紀律部隊居然公然造假，可謂罪加一等，陳楚鑫身為部門最高負責人，係咪應該問責先？係咪應該接受紀律調查先？太一叮強烈要求當局，除咗追究消防處弄虛作假嘅責任，亦要順手查埋消防處滋擾傳媒嘅醜行，咁先至可以將成個消防處蛇竇一次過清除，以免再害人害物吖，叮！