政壇：搞搞政：高佬賢唔入「帳」 陳克勤繼續捱
早前揭發「貪湯」前廉政專員湯顯明任內濫用公帑豪買茅台，又借公幹為名去觀光玩樂，立法會政府帳目委員會已先後就此召開十幾次會議，傳召貪湯、廉政專員白韞六同廉政公署社區關係處處長穆斐文作供。帳委會委員陳克勤就大呻帳委會工作量多，仲出到聲話希望下屆有其他黨友接替呢個位，等佢唔使再咁辛苦。
設計圖片及對白
立法會規定，加入帳委會可以當係入咗兩個事務委員會，但克勤仔就話帳委會工作繁重，又話貪湯醜聞愈揭愈多，帳委會嘅工作就愈來愈辛苦，成日都要坐定定睇文件，質疑秘書處計錯數，認為一個帳委會起碼等於三個事務委員會工作量至啱。
克勤仔又話上屆李慧琼為咗氹佢入帳委會，竟然同佢講話帳委會工作輕鬆，一啲都唔辛苦，依家佢入咗帳委會先發現貨不對辦，惟有叫對方請佢食飯補數。講講下，咁蹺黨內新丁議員漁農界嘅「高佬賢」何俊賢經過，克勤仔乘機游說高佬賢下屆代替佢加入帳委會，點知高佬賢一聽到佢咁講，就即時掉頭走。擺明唔受佢氹喇！
