政壇：陳恒鑌助山區醫療報恩
內地農村嘅醫療服務需求極大，但礙於人力同經費所限，衞生站條件差強人意，嚴重影響診治質素。立法會議員Ben陳恒鑌細細個就喺潮州普寧長大，六歲時畀有「赤腳醫生」之稱嘅鄉村醫生診斷佢患上流行性甲型肝炎。雖然食咗藥後好快好番，但阿Ben自此對赤腳醫生心懷感恩之情，仲發起「赤腳仁心」活動，希望可以提高山區衞生站嘅醫療質素。
陳恒鑌（左）向議員募捐，支持鄉村診所嘅翻新工作。
阿Ben尋日喺立法會向議員同事募捐，希望可以不分黨派支持鄉村診所嘅翻新工作。佢話暫時籌到二十萬元善款，希望最終可以籌到四十萬元，令更多小朋友受惠。佢又話新青聯發展基金會將會喺下月初舉辦粵曲音樂會及賣物會，仲邀請到食物及衞生局局長高永文主禮，希望可以喚醒更多市民關注山區醫療設備不足嘅問題。
