政壇：金磚之父爆印尼落榜原因
富達投資早前將墨西哥、印尼、尼日利亞、土耳其列為「鑄幣四國」（MINT），連高盛資產管理前主席，有金磚四國之父稱號嘅奧尼爾都buy，指佢哋人口結構喺未來至少二十年都有利增長，前景誘人，重要性不在「金磚四國」之下。佢仲大呻，每次出訪當地都畀官員同學者捉住問佢，做乜當年唔將佢哋擺落「金磚國家」，當中最「唔忿氣」嘅就係印尼。
奧尼爾話印尼最唔忿氣點解當年冇攞佢哋入金磚國家。（資料圖片）
奧尼爾最近撰文解畫，原來入圍「金磚國家」嘅其中一個準則，係政府要有足夠政策去實現潛在優勢。就以印尼為例，佢上星期去當地同上至來屆總統候選人，下至大型商場店員嘅不同階層傾偈後，都認為前景健康，可惜當年就係唔覺政府會做到嘢，發揮相對年輕嘅龐大人口，所以冇封佢做「金磚國家」。
亦因為咁，奧尼爾對近年日益高漲、要求將俄羅斯踢走嘅聲音不為所動。奧尼爾承認俄國人口下降、過度倚賴能源出口、貪污嚴重、亦欠缺法律框架保障企業，但當地官員依家明白油價唔會永遠上漲，唔願意聽太過樂觀嘅分析，所以奧尼爾相信佢哋會擁護真正有效嘅改革。
