政壇：中出升格「第五大商會」？
以往最傳統嘅四大商會分別係香港總商會、中華總商會、中華廠商聯合會及工業總會，至於「五大商會」呢個統稱，第五大商會講嘅係「地產建設商會」，但隨住政府多次推出穩定樓市辣招，令地產發展商同政府關係變得疏離，九月特首CY梁振英帶領商界到重慶考察，四大商會代表都齊晒人，中華出入口商會（中出）代表亦有份隨團，唯獨係地產建設商會就無人跟團。當時已有商界人士察覺到，認為中出有望成為第五大商會，但亦有商界人士覺得只係巧合。
中出頻頻請客，會長莊成鑫至今已經食咗四、五十隻大閘蟹。
但隨住今個星期一，中出同其餘四大商會聯合舉辦午餐會，成功請到CY出席，當時CY仲多謝五大商會邀請。有商界中人透露，之前四大商會通常同其他商會如澳洲商會、美國商會等合辦午餐會，但今年咁嘅組合屬首次。
每逢入秋，中出都會宴請政商界及傳媒好友到中出會所食大閘蟹，聽聞今年唔少高官都有捧場，連政務司司長林鄭月娥都係座上客，但據講林鄭怕寒涼唔敢食大閘蟹，只能品嘗其他美食，但足以印證中出地位今時唔同往日，莫非同該會活躍參與政治有關？
中出會長莊成鑫話今年大閘蟹質素好，中出慣例係一餐飯每人食三隻，但佢都要忍口，每餐一隻起兩隻止，但由十月尾至今已食咗四、五十隻。
