政壇：譚志源「播帶」抗泛民

話說公文袋嘅立法會議員陳家洛尋日搶先喺大會提出口頭質詢，質疑要求特首候選人宣誓擁護中華人民共和國憲法係違反《公民權利和政治權利國際公約》，係想篩走部分唔啱中央心水嘅候選人。白鴿黨嘅「鐵頭仁」何俊仁之後接力，話中國憲法中唔少條文都唔適用於香港，認為特首只要宣誓擁護《基本法》就已經足夠，質疑有關建議係畫蛇添足。

議員冇晒佢符

工黨嘅何秀蘭亦指出，中國憲法部分條文唔符合一國兩制，如果硬性規定候選人要擁護所有憲法，將會破壞一國兩制喎。其實泛民呢個問題係舊調重彈，亦有唔少人回應過呢個問題，今次再次提出相同問題擺明就挑機。

面對呢班泛民議員挑機，譚志源都見怪不怪，化身人肉錄音機反擊，話雖然中國憲法有好多條文，但本港法律係以《基本法》為依歸，所以不論是否有法律規定，特首擁護中國憲法是理所當然、應有之義，亦都符合憲制秩序和政治倫理。佢又話呢個主張只係部分社會人士嘅個人意見，希望對方可以提供理據同說明法理需要，政府會喺正式諮詢時連同其他建議一併考慮喎！就係咁，泛民都冇佢符。