烏煙瘴氣蔽維港 衰過內地真丟架
多得前朝曾蔭權政府好帶挈，雙非問題無窮無盡，單係來港爭奪幼稚園學位，已經搞到七國咁亂。其實，如果長遠啲睇，雙非問題話唔定有一日會自動消失，點解？好簡單啫，香港空氣質素每況愈下，污染程度仲嚴重過內地，咁烏煙瘴氣，仲邊有人敢嚟吖！
粵港政府組成嘅空氣監控網絡發表報告，顯示本港上半年空氣質素較去年同期惡化，其中荃灣及東涌嘅污染物濃度錄得超高水平，唔止超出國家環境空氣質素二級標準，甚至比廣州及深圳部分地區仲差；而本港嘅臭氧、二氧化硫及二氧化氮濃度亦全部錄得升幅。港府治污不力，成日賴珠三角，家陣證明香港空氣質素仲差過內地，咁又點解釋吖？
嗱，環保團體係咁講嘅，報告反映本港污染源頭並非全來自珠三角，柴油車等路邊污染源至係元兇，港府應該落重藥治本。冇錯嘞，世衞組織已經將空氣污染列為致癌物，如果港產官僚繼續冇心冇肺，治污唔嗲唔吊，同草菅人命冇乜分別嘅咋。以前貪曾做「氣候逃犯」，就話搵珠三角做遮醜布啫，依家貪曾已經滾蛋，污染元兇亦真相大白，港產官僚再冇藉口賴呢樣賴嗰樣嘞啩！
講到呢度，港人心情實在矛盾，一方面知道空氣污染其中一個源頭係本地柴油車，總算可以自己解決，唔使寄望內地治污；另一方面又對港府治污缺乏信心，講起真係好無奈o架。喂，更換舊柴油車仲要到二○一九年至完成，即係話市民仲有排吸廢氣喇，問你怕未。
所以話，香港空氣污染不斷惡化，柴油車固然係主因，但官僚無能至係罪魁。咁多年嚟，治污整色整水，花拳繡腿，一時停車熄匙，一時企圖推行慳電膽計劃，結果唔係擾民，就係無疾而終，全部得啖笑。港府窩囊無能都算，仲要弄虛作假，採用嘅空氣質素指標居然係二十六年前嘅貨色，比殘舊柴油車仲要老爺，就算明年更新，亦只係達到世衞最寬鬆嘅標準。你話嘞，港府虛應故事，敷衍民意，空氣質素又點可能改善吖。
今時唔同往日，以前內地人游水嚟香港，為嘅係呼吸自由空氣，依家自由空氣已被嚴重污染，變成毒氣，唔怪得好耐都冇人游水落嚟喇！
