SUN搞作：少膽虫手記：杏＋橙
「爽呀！爽呀！真係好爽！」淫賤黎房內傳出叫聲，聲聲入耳。「仲爽，唔係喪至啱咩？」少膽虫從門縫窺看，未見情況，突然一陣「啪啪」聲，嚇得少膽虫後退兩步。「邊個，邊個係門外鬼鬼祟祟，阻住我同腦細風流快活？」房內竟然傳出肥豪聲音，令少膽虫始料未及，「唔通男人都係貪新忘舊，有咗新人就棄舊將？」「仲唔同我入嚟？」淫賤黎咆哮。
少膽虫死死氣地走入房，眼前景象令少膽虫大吃一驚，竟然成地都係……橙皮，「腦細，你嘴角有粒核呀。」肥豪一施蘭花手，果核轉瞬即跌落。「肥豪，你呢啲橙真係好爽甜，真係食到停唔到口，開多幾箱嚟食囉！」肥豪將幾個紙箱搬出，雙手一放，啪啪聲又再出現。
「腦細，你啲橙原產邊度？」少膽虫口顫顫問。「係喎！肥豪邊度出產o架？」淫賤黎轉頭望向肥豪。「好似係江西。」肥豪邊食邊答。「腦細，你中招喇，啲橙同《爛果》一樣色！」少膽虫驚叫。「紅色？」淫賤黎同肥豪一望雙手，發現已經沾紅，即刻忍唔住狂嘔。
「係就係染過蘇丹紅，不過少膽虫係想話啲橙同《爛果》一樣都係……黑心嘅黑色呀！」
