政壇：陳淨心新炮台狙擊佔中
近年「愛港之聲」、「愛護香港力量」等撐政府組織如雨後春筍出現，近日又多一個「愛港行動」。早排活躍於「愛護香港力量」嘅陳淨心（淨心BB）就唔知幾時開始成為咗「愛港行動」嘅召集人。
陳淨心
早前「佔領中環」就針對教徒同教會搞咗個「支持民主政改商討日」，當日有成二百名基督徒參加。淨心BB就對佔中發起人戴耀廷四出洗腦深感憤慨，認為基督教團體對政治應保持中立嘅態度，唔應該鼓吹基督徒佔中。
淨心BB仲號召集網民去教會舉行一場「愛和平．反佔中」行動，聽日下午就會去大窩口循道衛理聯合教會亞斯理堂抗議，提醒教會要保持政治中立喎！
