政壇：長毛天殘腳立會爆笑彈
早前都講過立法會議員「長毛」梁國雄上星期日同林大輝踢波時不慎受傷，導致左腳骨裂，原本要留院六星期接受治療。不過，坐唔定嘅長毛又點會甘心被困醫院吖，戰鬥力大減嘅佢尋日坐住輪椅，由黨友黃浩銘推住返立會，見吓啲同事。
雖然長毛無去到開內務委員會會議，但就喺二樓撞到一班啱啱開完會嘅「阿人」李卓人、張超雄同人民力量「大舊」陳偉業。大舊先係慰問長毛傷勢，之後又指住長毛隻左腳話係「天殘腳」，之後又講笑話：「林大輝叫你踢波你又去！」跟住張超雄仲笑佢話立會突然多咗個殘疾人士添，長毛只好以笑回應。
工聯會王國興平時經常拎住隻血淋淋嘅假腳道具到立會，問政府幾時先肯推行單肢傷殘津貼，阿人就話長毛依家得番一隻腳，一定符合王國興嘅要求喎！
