政壇：格羅斯發財立品願裸捐
大家都聽得多「債王」格羅斯（Bill Gross）講美國退市、講債價，但最近佢竟喺Pimco網站嘅每月投資展望上，好感性咁話為自己擁有咁多財富感到內疚，極之贊成畀多啲稅，收窄貧富懸殊，死後仲會捐晒啲錢出嚟，大有發財立品嘅味道。
格羅斯話自己嘅財富，係建築於工人身上，覺得好有罪惡感喎。（資料圖片）
佢坦白交代自己嘅財富，係建築於工人身上，覺得好有罪惡感兼同情窮人。佢話自己同好多喺四十至六十年代出生嘅美國人一樣，享受經濟起飛年代嘅好處，受惠於列根同布殊年代嘅低稅率政策，至可以飛黃騰達。依家諗返轉頭，自己財富不斷增長，但勞工階層利益卻一直受剝削。
自認係美國最幸福百分之一嘅人之一，佢認為「資本利得率比工人所付的更低的時代應該終結」，仲呼籲社會權貴，支持接受「富人稅」，唔好再做唐老鴨嘅叔叔Scrooge McDuck，即係吝嗇鬼、守財奴同貪得無厭嘅人。佢呢番呼籲，正正就係股神巴菲特一直倡議嘅。
格羅斯目前財富達二十億美元，唔知佢係咪想發財立品呢，除咗關注美國貧富不均嘅問題，仲話同老婆已經有共識，會捐出全部財產添！
