政壇：肥亨銜頭多備三款卡片

商務及經濟發展局前局長「肥亨」馬時亨喺政商界人脈甚廣，好多時都會互相幫忙。尋日佢就幫澳洲會計師公會舉辦嘅高峰會擔任講者，一到場就不停搵其他講者，話要夾一夾論壇嘅流程，雖然咁忙，但都記得向一班在場記者大派卡片。當肥亨揭開個卡片套，原來內有秘密，皆因佢準備咗三款唔同嘅卡片，分別係香港大學名譽教授、農業銀行董事同中國移動集團外部董事，真係派極都唔完。其實佢仲係好多間公司嘅非執董，如果張張卡片都帶出街，真係唔知個卡片套要幾大先夠裝！