政壇：雷鼎鳴倡投票獎500蚊
香港選舉嘅投票率一直都偏低，「幫港出聲」就話得咁少選民投票，投票結果係咪反映民意真係令人懷疑。為咗令沉默嘅大多數都發表意見，提高投票率，佢哋嘅教授團代表、香港科技大學商學院副院長雷鼎鳴就向政府獻計，建議實施強制性投票制度，如果選民去投票就可獲派五百元鼓勵，既可還富於民，又可令市民盡公民責任，好過政府早前齋派六千蚊仲被人鬧咁話。不過，政府同建制派係咪支持谷高投票率呢？
稱有助社會穩定
「幫港出聲」尋日開簡介會建議法定強制性投票，雷鼎鳴話依家香港約有五百五十萬合資格選民，登記選民就有三百四十七萬七千人，而舊年立法會選舉有投票嘅僅得一百八十三萬九千人，投票率得三成三。佢話有啲國家投票率有七成，都懷疑選舉結果係咪反映到民意，香港投票率咁低，結果咪就淨係反映一啲政治活躍選民嘅取向。
雷鼎鳴又話依家香港社會撕裂、對立情況相當嚴重。佢相信現時「沉默的大多數」都係啲比較中性嘅人，如果呢班人都投票就可令香港社會和平理性一啲，所以強制投票對社會穩定有幫助喎！
點樣可令市民乖乖地盡公民責任投票呢？佢話依家有二十幾個國家實施緊唔同程度嘅強制性投票，有啲會以罰款、取消選民資格、唔准用公共服務等方式懲罰啲唔做選民或唔投票嘅市民。不過，佢就覺得講到罰罰聲大家都唔會鍾意，所以如果派錢嘅話就皆大歡喜喇。佢仲計埋，如果有五百萬人投票，每人派五百元，都係使二十幾億元，好過冇目的咁向市民派六千蚊咁話。
