幼園亂象未解決 補鑊六招如虛設
怪事年年有，今年特別多，幼稚園爭位風波沒完沒了，本地家長受盡煎熬，怨聲載道。後知後覺嘅政府早前推出六招補鑊，以為咁就可以解決問題，有「唔得掂」之稱嘅教育局局長吳克儉仲拍心口保證學額足夠，叫家長唔使擔心添。事實係咪咁呢？叮，信佢一成，雙目失明！
所謂嘅六招，包括幼稚園無限派表、網上派表、以就近入學原則收生、增加學額、一人一位統一註冊、為家長提供剩餘學額資料。吳克儉話喎，今次係特事特辦，有信心解決亂象。可惜吖，港產官僚講就天下無敵，做就無能為力，呢六招漏洞百出，形同虛設，特事特辦變成亂上加亂。
呢，有家長踢爆，「無限派表」、「網上派表」根本係一廂情願，事關北區七至八成幼稚園都無能力執行網上無限派表，就算小部分可提供網上派表，亦做唔到網上收表，結果又係要家長親身排隊交表。正如有立法會議員話齋，幼稚園人手有限，即使做到無限派表，亦冇可能無限收表、無限面試，當局一味將問題歸咎於收生程序，將個波踢畀幼稚園後就關人個關，從未提供任何支援，完全係不負責任。
至於所謂學額充足咯喎，一樣係吹水唔抹嘴，依家唔只北區幼稚園一位難求，其他區一樣爭崩頭吖。有間位於深水埗嘅幼稚園透露，今年收到二千三百份申請表，較去年激增四成四，早前更收到疑似中介公司寄來三個包裹共三十份申請表，全部係內地嘅住址；而元朗區幼稚園整體申請亦較往年急增三分之二，搞到本地家長人心惶惶。
事實證明，唔少雙非學童開始轉移陣地，「爭奪」市區學額，北區家長瞓街排隊嘅場面隨時蔓延到全港，問你怕未。正所謂，可憐天下父母心，為咗一個幼稚園學位，通宵排隊有之，遊行抗爭有之，甚至引發罵戰，加劇中港矛盾，簡直七國咁亂。嗱，尋日有批北區家長約見吳克儉，抗議六招無效，要求採取更有效措施解決問題，唔知今次會唔會又係唔得掂？
太一叮諗極都唔明，雙非問題係港府一手造成，港產官僚明知唔少雙非兒童會陸續回流本港讀書，點解唔早啲採取應對措施，而係要等到七國咁亂先至補鑊？依家連幼稚園派位嘅問題都解決唔到，日後輪到小學及中學爭崩頭豈不是天下大亂？
