城中鏡：茶癡楊孫西日飲四種茶
政商界名人不乏愛茶之人，身兼中國茶文化國際交流協會會長嘅福建幫頭領楊孫西，稱得上係「茶癡」，日飲四種茶，真係飲茶多過飲水。菁英會文化藝術研究會主席Candy莊家蕙日前喺灣仔會展舉辦「茶酒香論壇」，請嚟楊孫西大談茶經，佢話每朝起床先嚟一杯武夷山岩茶清清腸胃；中午飯後就歎杯龍井或鐵觀音；下午茶就鍾情港式奶茶；晚飯應酬多，自然要飲杯普洱茶消消滯啦！
楊孫西（右）大談茶經，莊家蕙（左）全程聚精會神聆聽取經。
楊孫西話試過同茶迷搞「馬拉松式茶聚」，由晚上八點鐘飲到深夜十二點，橫掃三十年、五十年、八十年，甚至一百年嘅頂級茶餅，飲完頭頂冒汗，大呼過癮。鍾情茗茶同品酒嘅Candy就慨嘆，香港經常被笑係文化沙漠，所以佢希望搞多啲論壇匯聚文化愛好者，扭轉風氣。Candy收藏唔少中國山水畫同當代藝術畫作，佢買畫堅持講心唔講金，拒絕以升值潛力嚟衡量一幅畫嘅價值。
