城中鏡：陳榮聲唔夠瞓周末補數
香港人經常OT捱眼瞓見怪不怪，作為管理層嘅友邦香港及澳門首席執行官陳榮聲貴人事忙，平日點會有覺好瞓，所以佢一樣要靠周末瞓番一覺補番，昔日都仲會打籃球鍛煉身體，依家去戶外活動真係少之又少喎!
調查顯示港人健康指數欠佳，陳榮聲（右）呼籲大家注重健康。
友邦保險一項調查顯示，港人健康指數僅五十八分，喺亞洲區十五個市場中排尾三，百分之八十六受訪者同意健康比五年前差，佢哋仲面對一個新威脅，就係愈嚟愈沉迷使用社交網站或上網，幾乎有百分之六十四港人做咗「低頭族」。陳榮聲都一樣做咗「低頭族」，佢話自從有智能手機之後，就機不離身，咁咪即係工作不離身。同香港一般打工仔一樣，佢幾乎無放工時間，休息時間就梗係唔夠啦！調查顯示，港人理想睡眠時間係八點二小時，但係實際睡眠時間就得六點五小時。
